Yr arweinydd presennol yw Menai Williams. Ers iddi gymryd yr awenau ym 1993, bu’n gyfnod llwyddianus dros ben yn gystadleuol. Yn ogystal â llwyddianau’r Eisteddfod Genedlaethol, mae’r côr wedi ennil cystadleuaeth Stena Sealink yn Llandudno ym 1996 a 1999. Gan barhau’r cyswllt Celtaidd, croeswyd i’r Ynys Werdd ac ennill cystadleuaeth ryngwladol Gwyl Gorawl Sligo ym 1995.

Mae’n gôr poblogaidd iawn ymysg cymdeithasau Cymraeg ledled Lloegr, gan gymryd rhan mewn cyngherddau Gwyl Ddewi mewn mannau fel Llundain, Birmingham, Manceinion, Bradford, Gillingham, Bury St. Edmunds, a Tunbridge Wells. Pleser i’r cymdeithasau hyn yw canfod fod pob aelod o Gôr Meibion Caernarfon yn siarad Cymraeg. Mae’r côr hefyd wedi teithio llawer i gynnal cyngherddau ar gyfandiroedd Gogledd America ac Ewrop.

Mewn sawl cystadleuaeth lwyddiannus cyfeiriodd y beirniaid at ddawn cyfeilydd y côr, Mona Meirion Richards.  Roedd hi a Menai yn bennaeth a dirprwy adran Gerdd Ysgol Uwchradd Syr Hygh Owen, Caernarfon, y ddwy yn amlwg yng nghylchoedd Cerdd Dant, a’r ddwy wedi derbyn anrhydedd uchaf gwisg wen yr Orsedd yn Eisteddfod Meirion a’r Cyffuniau 1997, i gydnabod eu cyfraniad aruthrol i’r diwylliant Cymreig.

Llywydd Anrhydeddus Côr Meibion Caernarfon yw’r bariton o Bantglas, Bryn Terfel. Yn laslanc dwy ar hugain oed bu ar daith gyda’r hogiau hyd arfordir dwyreiniol Unol Daleithiau’r America.  Meddai Bryn: “Mae’r côr yn llysgenhadon ardderchog dros Gymru a’r Gymraeg ble bynnag yr ânt, ac mae nhw’n medru canu rhywfaint hefyd!